Épisodes

  • 17. Arena niedha

    17. Arena niedha
    Oct 9 2025
    Dexesseti puntàdas, su biaxi cosa nosta est spacendi. E dd’acabaus contendi su Poetu de una borta e de comenti nc’est arrumbulau fintzas a oi. Arena bianca, casotus coloraus, amigus de una vida… e totu ‘d’una su “ripascimento”, chi mùdat totu po sèmpiri. Arregordus, feli e contus de un’istadi chi no at a torrai. Adiosu, Poetu, sa storia tua abàrrat cun nosus.
    Voir plus Voir moins
    37 min
  • 16. El Mago

    16. El Mago
    Oct 2 2025
    Fabian O’Neill, “Su Brùsciu”, una vida faendi amachiai is atrus giogadoris cun is tunnel, cun notis chi no tenìant ora de spaciai, e bisus acabaus a innanti de su tempus. De s’Uruguay a Casteddu cun sciopinus, spantus e prantus, pintaus sa figura de unu campioni stravanau ma fàcili a s’arrovinai. Una vida bìvia for’e arrégula, cun sa malaspétzia de chini scidi de essi abruxau meda, ma no s’arregordu de cussus chi dd’ant stimau.
    Voir plus Voir moins
    38 min
  • 15. Sa noti de is fogus

    15. Sa noti de is fogus
    Sep 25 2025
    Obrescendi su 2000, cun festas e binu spumanti, Casteddu si ndi scìdat cun ferìas antigas e mai serradas: est “sa Not’e su Fogu”. Depiat essi su cumentzu de s’edadi de s’òru, e invecis in Is Mirrionis e in Santu Miàli, abrùxant màchinas in sa ruga. E benimindi allirghìa po su tempu benidori. Su millénniu nou partit pudésciu de benzina, diavolina e cun scórrius antigus de bixinau. Beni arribaus in su duamila, a sa moda casteddàia.
    Voir plus Voir moins
    37 min
  • 14. Coru de arrúga

    14. Coru de arrúga
    Sep 18 2025
    “Zona Franca”, est su programa de Antonello Lai chi at amostau in televisioni sa parti de Casteddu prus acuàda e scaréscia. De is murus scroxolaus de bia Castelli fintzas a is chèscias de Is Mirrionis, at donau boxi a chini no ndi teniat, furriendi su feli e su turmentu de sa genti in d’unu contu comunu. Est po custu chi su nòmini de Tziu Lai abàrrat scritu in is murus e in su coru de sa genti.
    Voir plus Voir moins
    35 min
  • 13. Nichi, su mundu in s'arretza

    13. Nichi, su mundu in s'arretza
    Sep 11 2025
    In su 1994 Casteddu si fùrriat, po una scuta, a bìddiu de su mundu digitali: nascit Video On Line, su primu provider internet italianu, postu in pei de s’imprentadori Nicola Grauso. Casteddu bivit unu scallentamentu mannu, suspéndia intra de prexu e barrancus sotzialis. Est cumentzàda una rivolutzioni chi promitit de mudai totu, ma chi at a mostai in pagu tempus cambas curtzas. Un’istória bisadora chi partit de Sardigna e fuèddat a su mundu.
    Voir plus Voir moins
    40 min
  • 12. Sa cugurra

    12. Sa cugurra
    Sep 4 2025
    Una truma de amigus fuèddat de calisisìat cosa, foras chi de sorti bona. Difatis c’est una cositedda, pitica ma picigòngia chi fait tremi paris is casteddàius: sa cugurra, sa bestiedda chi pungit e fait perdi is partidas de su Casteddu. E chini est allumingiau po Cugurra est su portadori mannu de scumùniga in dònnia truma de amigus. Unu contu de passioni rossoblù e de una sorti chi parit scrita.
    Voir plus Voir moins
    38 min
  • 11. S'andàda 'e su pruini

    11. S'andàda 'e su pruini
    Aug 27 2025
    Su 3 de abrili 1995, in Casteddu, Antoni “Vespinu” Fanni si presèntat a Palàtziu de Giustìtzia po cunfessai unu bocidròxiu: po sa borta chi ìant bocìu a su meri de su Bevimarket, Giambattista Pinna, su 23 de mes’e idas de su 1985. Giai delincuenti e imoi pentìu, Vespinu bògat a pillu beridadis de atzutzuddai is pilus apitzus de sa banda de Is Mirrionis e apitzus de su sbàlliu de sa giustìtzia chi at fatu intrai in presoni unu notzenti. Un’arrogu scuriosu de sa stória criminali casteddàia, chi ndi scarràxat arregordus de violéntzia, pentimentus e de una giustìtzia chi po tropu tempus no est arribàda.
    Voir plus Voir moins
    39 min
  • 10. Lèbius in sa terra

    10. Lèbius in sa terra
    Aug 21 2025
    1995: arrìbat sa nova chi est mortu su scriidori casteddaiu Sergio Atzeni, un’omini acapiau cun dónnia sentidu a su mari e a sa tzitadi cosa sua. Cun giornalis, cinema, teatrus e sa passioni po su Poetu, cumentzaus unu biaxi in sa vida e in s’anima de un’autori chi at contau cun boxi unica is personàgius chi prus pagu si biint, in Casteddu. Una tzitadi era, fata de genti de dónnia dì, chi dónnia dì si dda depit gherrai.
    Voir plus Voir moins
    37 min
adbl_web_global_use_to_activate_DT_webcro_1694_expandible_banner_T1