I boschitscha uso lek barikaneder sveco ando bersch genel taj le lek buteder familijendar baro mulatim ol. Na tschak la Kedveschna Rat, hatek te la cila adventiskera cajt, jek baro barikanipe ando bersch hi. Ande amari adiveseskeri sendung Roma sam schunen tumen vodschikane Romengere-pamaristscha, save i Susanne Horvath taj o Josef Schmidt genen.

Le Roma Advent imar sajt but berscha tradicija hi. Ov tel likerdo ol, kaj o terdschojipe la flogoskera grupntar le Romendar naschado te na ol, taj kaj i tradicij taj i kultura soraljarde te on. O terdschojipe la flogoskera grupnatar ando pradipe terdschivdo taj sikado te ol.

Na dur pal, Tenu Erbate jek barikano jubilejum mulatim ulo taj odoj papal sikatscha pe, saj koja o but tschibtschakero vakeripe taj i krejativi sikadipeskeri buti ando Burgenland khelen. Jek nevo projekto la organisacijatar UMIZ4KIDS adaj ando maschkarutno punkto terdscholahi, vodim muschikatar, poesijatar taj but terne talentirti tschavendar taj tschajendar.

Ando maschkarutno novemberi ande Lackenbach, o sako berschengero gondolipe le Romenge taj Sintijenge tel likerdo ulo. But eseri manuschenge o logeri Lackenbach i lejcti schtacijona sina, angloda on ande avre logertscha ledschim taj murdarde ule. Uso gondolipeskero mulatintschago te adabersch but fatreterkiji taj fatretertscha la thaneskera- taj la bundakera regirungatar taj le Romengere organisacijendar use sina.

O gendo le manuschendar, save andi cajt la NS-diktaturatar le tradimenge arakipe taj pomoschago denahi, igen tikno hi. O György Gedeon Rohonczy andar i Uprutni Pulja, jek odole tschulendar sina. Ov buteder sar 120 burgenlanditike Roma retintscha. Leske ande leskero hajmatakero foro jek gondolipeskero than kerdo ulo.

I Katharina Graf-Janoska ando bersch 1988 andi Tikni Martona upro them ali. Oj literaturakeri visenschoft taj filosofija andi universiteta Betschi schtudirintscha. Sajt 2015 ojs reporterkija taj moderatorkija le ORF-iske Burgenland butschalinen taj te o flogoskere magacintscha, afka sar „Romano Dikipe“ taj „WIR“ moderirinel.

Ando bersch 1992 erschtivar andi austritiki bare raschajengeri konferenca jeke fatreteriske i buti la Romengera pastoralatar prik dim uli. Akor ando bersch 1996 o referat le etnischi grupnenge andi diöcese Tikni Martona kerdi ulo.

Ando keripe le projektostar „O DROM ANDI CUKUNFT“ le Trendwerkistar, Erbate jek sensibilisirinipeskero workshop usi tema Roma kerdo ulo. O Martin Horvath le farajnistar HANGO Roma taj o Marcel Horvath le projektostar „O DROM ANDI CUKUNFT‘“ le institucijonenge, save use sina, dikiptscha andi historija, kultura taj ando dschivipe la Romengera flogoskera grunatar dine.